Футбольный клуб "Руденск"

ФК “Рудзенск”: аднаўленне гульні на фоне фінансавых праблем

svislac — Wed, 14 Sep 2011 14:53:13 GMT

Нягледзячы на досыць складаную сітуацыю унутры клуба, ФК "Рудзенск" на сваім полі атрымаў так патрэбную перамогу над пінскай "Хваляй". Гэта дазволіла камандзе хоць крыху падняцца над зонай вылету з І лігі.

Пра апошнюю гульню і стан справаў у клубе і пойдзе гаворка ў артыкуле.

Футбольны клуб "Рудзенск" шмат каго здзівіў навінамі перадсезонкі. З аднаго боку каманда Івана Барташэвіча не пеставала навінамі спецыялізаваныя СМІ, але некаторыя прозвішчы, што салі павязваць з "Рудзенскам" унушалі аптымізм. Так, на трэнерскім мастку з'явіўся дуэт некалі вельмі вядомых футбалістаў – Віктара Сокала і Паўла Раднёнка. Галоўным трэнерам меўся стаць Сокал, але паколькі ня меў яшчэ ліцэнзіі па дакументах прайшоў чалавек, які яшчэ ў 2010 годзе трэніраваў маладзёжную зборную Казахстана – Павал Раднёнак.

Вынікі перадсезонных гульняў таксама надыхалі на аптымізм – такой упэўненай гульні з камандамі аднолькавага і вышэйшага узроўню "Рудзенск" не дэманстраваў ўжо даўно. Да і сам спадар Раднёнак у інтэрв'ю газетам казаў, што задача каманды – барацьба за "тройку прызёраў". Пры гэтым галоўны трэнер выказваў задавальненне ходам падрыхтоўкі да сезону. Па селекцыйнай рабоце спадар Павал заўважаў, што ў межах існага адносна невялікага бюджэту зроблена багата.

І сапраўды, з камандай застаўся касцяк гульцоў, якія былі на мяжы сыходу з прычыны непаразуменняў з мінулым трэнерам – Ю. Пышнікам. На праглядзе пабывала дастатковая колькасць футбалістаў і некаторыя з іх узмацнілі гульню "Рудзенску".
Аптымістычна гучалі і словы старшыні Пухавіцкага выканкаму сп. Каралені, які ў інтэрвью газеце "Всё о футболе" заяўляў пра істотныя пляны падтрымкі ФК "Рудзенск".

Аднак не ўсё так бывае як чакаеш. Праблемы ў беларускай эканоміцы досыць балюча ударылі па асноўных спонсарах ФК "Рудзенск"....\Скарочаны варыянт - поўны артыкул на Свіслач: рэгіянальны партал/

Што да Пухавіцкага РВК і падтрымкі з бюджэту – пры цяперашніх эканамічных рэаліях, натуральна, што гэтыя грошы нават у разе паступлення не будуць выглядаць па сваіх аб'ёмах як істотныя інвестыцыі ў каманду.

На гэтым фоне ўжо у сярэдзіне красавіка стала бачна, што фінансавы стан клубу вельмі і вельмі хісткі. Пачаліся праблемы з выплатай спачатку прэміяльных а пасля наогул заробку футбалістам. Што, натуральна, адбілася на якасці гульні: за чатыры вясенніх туры каманда скацілася з пятага на 15 месца ў лізе. Горш сітуацыя была толькі у ФК "Баранавічы", які наогул быў дапушчаны да спаборніцтваў у апошні дзень і укамплектаваны выпускнікамі і вучнямі спартовых школ.

Дайшло да таго, што футбалісты "Рудзенску" выйшлі на кубкавую гульню супраць "Тарпеда" адмовіліся выходзіць на поле ў сувязі з даўгамі па заробках. Але аператыўная нарада з прадстаўнікамі спонсараў клубу пераканала гульцоў у тым, што "не ўсё яшчэ страчана". І пачаўшыся з 15-і хвілінным спазненнем матч завяршыўся перамогай Рудзенску 2-1. Наступныя туры таксама пацвердзілі, што Павал Раднёнак меў рацыю, калі казаў пра патэнцыял каманды (у стане бароцца за выхад у тройку): за чэрвень-пачатак ліпеня каманда набрала 12 балаў у 4-х гульнях і выйшла на 9 месца.

Аднак няма нічога больш сталага чым "часовыя" фінансавыя цяжкасці. Клуб працягвала біць у фінансавай ліхаманцы. Гульцы разняверыліся у фінансавых магчымасцях працадаўцы прайгравалі адну гульню за другой. У перапынку чэмпіянату каманду наогул пакінулі галоўны трэнер і некалькі футбалістаў. Вось што Павал Раднёнак сказаў пра прычыну зыходу ў адным з інтэрвью:

\Скарочаны варыянт - поўны артыкул на Свіслач: рэгіянальны партал/
— Почему ушли из «Руденска»?
— У меня есть бзик — люблю получать удовольствия от всего, чем занимаюсь. А когда в команде начались финансовые неурядицы, о творческом подходе не стало и речи. В таких ситуациях начинаешь деградировать. Лучше иногда ничем не заниматься, чем заниматься чем-то и кое-как.

Тым не меней, Іван Барташэвіч знайшоў пэўныя рэзервы (у тым ліку і ў працы са спонсарамі) – стан ФК "Рудзенск" на сёння хоць і не аптымальны але ўжо і не "катастрафічны". Прыйшоўшыя сродкі дазволілі камандзе думаць пра латанне дзірак у складзе (напрыклад, да канца сезона у арэнду у "Гарадзеі" узяты паўабаронца Аляксандар Тарлікоўскі, які ўжо выступаў за "Рудзенск" у сезоне 2009 году).

І, наколькі зразумела з гульні каманды, задача перад ёю зараз стаіць хоць і меньш амбіцыйная, але рэалізуемая ў варунках існага розыгрышу: умацавацца у сярэдзіне турнірнай табліцы як мага далей ад зоны вылету.

Трэба адзначыць, што футбалісты досыць паспяхова яе рэалізуюць. У чатырох апошніх турах ФК "Рудзенск" узяў 7 заліковых балаў. Што дазволіла крыху падняцца з небяспечнага 14-га месца. Праўда, запас ачкоў пакуль досыць хісткі. Калі з Баранавічамі усё зразумела (каманда мае толькі 3 бала пасля 20 тураў), то вылятное "15-е" і 12-е месцы ў табліцы раздзяляюць усяго толькі 3 бала – кошт адной перамогі.

Тым не меней, пакуль што гульня ФК "Рудзенск" зноў пакідае аптымістычныя уражанні. Для пацвярджэння гэтага прыводзім кароткае апісанне сустрэчы 20 туру з пінскай "Хваляй" 10 верасня.

20 тур. "Рудзенск"-"Хваля", Мар'іна Горка, 100 гледачоў
"Хваля", як каманда, якая стаіць вышэй за "Рудзенск" у табліцы і якая мае станоўчую гісторыю двубояў з нашым клубам пачала з атак. Першы кутавы пасля невялікага пажару ў нашай штрафной госці зарабілі ўжо на 6-й хвіліне.

11-я хвіліна. Брамнік Рудзенску Мялік ліквідуе небяспеку пасля навесу з левага фланку. Праз 5 хвілін таксама навес злева і нападнік "Хвалі" Каралюк з лініі брамнай пляцоўкі пацэльвае вышэй за перакладзіну. 18-я хвіліна – штрафны ў наш бок – гулец гасцей патрапляе ў сценку.

Гэта – кароткі пералік стартавага штурму "Хвалі". Тое што ён быў сведчыць таксама адзін факт: першы кутавы гульцы Рудзенску падалі толькі на 19-й хвіліне. А дзесці хвілінай пазней нашы абаронцы упускаюць таго ж Каралюка, які з 7-і метраў (кут брамнай) расстрэльвае Мяліка. Брамнік адбівае мяч, і на шчасце ніхто з футбалістаў "Хвалі" да адскоку не паспеў.

Аднак наступныя падзеі сталі фактычна халодным душам для гасцей. На 25-й хвіліне Рудзенск атрымлівае права на штрафны на непадалёк ад штрафной "Хвалі". Розыгрыш, мяч патрапляе на правы фланг да Талкачова. Той робіць прастрэл уздоўж брамы і Трындзюк замыкае гэтую перадачу. 1-0 на карысць "Рудзенску".

Наступная хвіліна – пасля розыгрышу ў цэнтры поля "Рудзенск" перахоплівае мяч. Той жа Талкачоў змяшчаецца бліжэй да правага кута штрафной пляцоўкі і метраў з 20 б'е. Мяч, падскочыўшы перад ужо ляжачым брамнікам гасцей улятае ў сетку. 2-0
Пасля гэтага гульцы "Хвалі" крыху разгубіліся. Рудзенск у сваю чаргу пастараўся перавесці гульню на бок праціўніка. Што, дарэчы атрымалася. Калі вострых момантаў у выкананні нашых футбалістаў было небагата, то з атак "Хвалі" наогул запамяталася хіба атака пад канец тайма. Прыкладна на 40-41-й хвіліне нападнік Хвалі выйшаў на ударную пазіцыю, але ягоны удар быў блакаваны абаронцам "Рудзенску".

Другі тайм таксама праходзіў збольшага па ранейшаму сцэнару. "Хваля" спрабавала атакаваць і атакаваць вялікімі сіламі, "Рудзенск" небяспечна контратакаваў. За першыя 15 хвілін тайму госці тройчы небяспечна пагражалі нашай браме. Спачатку удар Валодзька з 10 метраў – Мялік парыраваў удар. Праз 2 хвіліны пасля падачы кутавога небяспечны удар галавой – мяч ляціць у лічаных сантыметрах ад стойкі. І нарэшце, мусіць самы драматычны эпізод матчу. 58-я хвіліна. У нашай штрафной зносяць нападніка "Хвалі". Арбітр указвае на "кропку". Узгаданы вышэй Валодзька б'е 11-і метровы, Мялік адбівае. Да дабіванне паспявае нападнік Хвалі, але пасля ягонага ўдару мяч ляціць вышэй брамы.

Нашы гульцы, якія першыя хвіліны 2-га тайма дзейнічалі на контратаках пачалі прыбіраць ініцыятыву і мелі цудоўную магчымасць павялічыць лік – на 66-й хвіліне Шамшорык не прабіў брамніка гацей з "убойнай" пазіцыі.
Але, калі не забіваеш ты – забіваюць табе. Што і прадэманстравала "Хваля". На 84-й хвіліне нападнік гасцей Каралюк удала рэалізаваў выхад сам-на-сам з брамнікам Рудзенску: 1-2.

Пабачыўшы, што перамога можа сыйсці з рук, "Рудзенск" паспрабаваў устроіць фінальны штурм. Што, дарэчы і атрымалася. Ужо на 5-й (!!!) дададзенай хвіліне госці зносяць у сваёй штрафной Тарлікоўскага (таго самага – узятага у арэнду у "Гарадзеі" 2 верасня).

Аляксандар сам выказаўся рэалізоўваць пенальці і не схібіў. 3-1 на карысць "Рудзенску" – такі фінальны лік гульні.

За Рудзенск гулялі: Мялік (бармнік) Тарлікоўскі, Міненкоў (на 80й хвіліне заменены на Ебабісэ), Федасееў, Палазнік, Шамшорык, Трындзюк, Трэпачкін (на 69-й хвіліне заменены на Шчуцкага), Талкачоў (капітан) (на 56-й хвіліне заменены на Сарасека), Наздрын-Платніцкі (замена на Міськіва на 90+1й хвіліне), Шалудзька (замена на Плячысціка на 64-й хвіліне).
На лаве запасных заставаліся Юркевіч і Петрусевіч.

Поўная версія артыкула з усімі графікамі і фота на Свіслач: рэгіянальны партал

Што рабіць з сайтам. Хачу параіцца

svislac — Fri, 29 Jul 2011 16:02:40 GMT

Добрага часу сутак, спадарства.
Тлумачу сітуацыю. Сайт быў запачаткаваны былым працаўніком клюбу, які мне свайго часу надаў магчымасць посціць навіны.
АЛЕ: хлопец звольніўся расстаўся з "Рудзенскам". І, наколькі разумею не на мажорнай ноце. Для мяне самога падтрымка сайту (ці прынамсі вывешванне навінаў цягам 2010 году) было як "дадатковая нагрузка" - асноўны мой рэсурс "Свіслач: Рэгіянальны партал" (як магчыма вы ўжо здагадаліся)
Чаму рабіў? Лічу, што калі ёсць наведвальнікі і ствараецца кола заўзятараў клюбу - гэтую справу трэ падтрымліваць у тым ліку і сайтам. Тым больш, што пры ўсіх рознабаковых поглядах на дзейнасць І. Барташэвіча, ФК "Рудзенск" адзін з нешматлікіх прыкладаў, калі каманда і клюб узнікаюць дзякуючы ініцыятыве ЧАЛАВЕКА а не чыноўніка.

Праблема ў наступным:
1. Я разумею, што не з'яўляюся экспертам у футбольнай тэматыцы
2. Часу досыць часта не хапае нават на Свіслацкі партал (яго таксама цягну ў вольны ад працы час і без "грашовай кампенсацыі" ужо 4 гады як)...
3. Я - не удзельнік "фэнаўскай" тусоўкі і адпаведна не магу перадаць атмасферу што пануе сярод спагадачоў.

Таму сумняюся што ў стане ўсебакова асвятляць падзеі вакол каманды. І "маўчанне" цягам апошніх 6-і месяцаў таму падцверджанне.
АЛЕ мяркую, што можна такі наладзіць працу гэтага сайту і/ці у перспектыве пераехаць на больш прыемную пляцоўку. Для гэтага патрэбныя навіны ад саміх сапгадачоў, ад каманды.
І, наколькі я разумею, зараз я ў стане надаць прывілеі адміна камусці з карыстальнікаў (што дазволіць члавеку посціць навіны без майго папярэдняга прагляду).

Такім чынам 2 пытання:
1. Ці спрабаваць па меры з'яўлення вольнага часу мне займацца сайтам?
2. Хто б схацеў дапамагчы ў гэтай "няўдзячнай працы" (са свайго боку абяцаю таксама дапамогу чалавеку у выглядзе пэўных парадаў/кансультацый/знаёмству з людзьмі што могуць падвучыць як пісаць для СМІ)?
Адказы прашу пісаць у каменты да гэтага паста ці на мыла svislac@gmail.com

З найлепшымі пажаданнямі
Адміністратар Свіслас: Рэгіянальныя партал і, як атрымалася аўтар больш чым 80% пастоў на неафіыйным сайце ФК "Рудзенск"

ФК Рудзенск. Сезон 2011. Відэа кубкавай гульні з Тарпеда і 13 туру з Партызанам

svislac — Mon, 25 Jul 2011 13:00:03 GMT

Чэмпіянат Беларусі па футболу падыходзіць да завяршэння першага колу. ФК "Рудзенск" напярэдадні сезону абдарыў заўзятараў спадзяваннямі на паспяховы выступ у сезоне-2011. Аднак, пакуль каманду "ліхарадзіць" – калектыў з добрымі трэнерамі і неблагімі выканаўцамі то з'язджае да "зоны вылету" то стварае сенсацыю. Апошнія туры клуб на пад'ёме. Ці гэта пачатак адраджэння – будзе бачна ўжо па выніках заўтрашняга матчу.

Прапануем вашай увазе відэасправаздачу аб гульні 1/16 кубку Беларусі і гульні 13 туру чэмпіянату ІІ лігі:

Аналіз падзеяў у клубе, ягоных праблемах і статыстыка гульняў на Свіслач: Рэгіянальны партал

Навічкі ўзмацнілі гульню

svislac — Thu, 19 Aug 2010 11:04:45 GMT

Мінулай суботы ФК "Рудзенск" удала правёў матч на выездзе супраць ФК "Смаргонь". Перамога 0-2 пры поўнай перавазе нашых гульцоў. Да таго ж адным голам вызначыўся навічок каманды. Да і астатнія набыткі ФК "Рудзенск" ствараюць падставы для аптымізму

Напярэдадні і ў пачатку другога кола чэмпіянату Беларусі па футболу сярод каманд першай лігі ФК "Рудзенск" істотна змяніў свой склад. Каманду пакінулі адразу 4 гульца асновы. Магчыма, гэта і стала адной з прычын хатняга пройгрышу Гомелю.
Але іншыя навіны трансфернага рынку і гульня ў Смаргоні ізноў надыхаюць аптымізмам.

Спачатку пра набыткі. Мы ўжо пісалі пра пераход у нашу каманду абаронцы "Партызана" Максіма Горбача. На жаль, ён быў адзіным з навічкоў, каго трэнерскі штаб здолеў выпусціць на поле у гульні з "Гомелем". А вось за наступныя 7 дзён каманда папоўнілася адразу трыма навічкамі.

Гэта:
нападнік Сяргей Кошэль, які перайшоў да нас з ФК "Рудзенск". Сяргей нарадзіўся 14 сакавіка 1986 году у г. Бабруйск. Прафесійную кар'ёру распачаў у ФК "Мінск". У 2008 годзе – лепшы бамбардзір першай лігі, у 2009 – выкліканы на прагляд у зборную Беларусі. У 2010 з прычыны аднаўлення пасля траўмы практычна не патрапляў у аснову ФК "Мінску".

Таксама з "Партызану" у каманду прыйшоў дасведчаны абаронца Аляксандр Сташчанюк. Аляксандру 27 год. (нарадзіўся 23 лютага 1983 году), выступаў за МТЗ-РІПО. Мае досвед выступаў у Еўракубках, гуляў за моладзевую зборную Беларусі.

Трэцім набыткам стаў малады брамнік Яўген Тайкевіч (дата нараджэння 16 лютага 1989 году), які перайшоў да Рудзенску з ФК "Шахцёр" (Салігорск). Яўген пачынаў кар'еру ў ФК "Бяроза". У "Шахцёры" на жаль, у аснову "першай" каманды не патрапляў. Выступаў за дубль. Набыццё брамніка звязана з тым, што Уладзімір Юркевіч, верагодней за ўсё, неўзабаве скончыць сваю футбольную кар'еру. Магчыма, Уладзімір застанецца на трэнерскай працы. Але пра гэткія перспектывы пакуль казаць рана.

Цяпер пра гульню.
14 жніўня ў 17 туры чэмпіянату Беларусі па футболе ў першай лізе ФК "Смаргонь" нічога не здолела супрацьпаставіць "Рудзенску". Дастаткова сказаць, што, нягледзячы на выдаленне на 40-й хвіліне Дзьмітрыя Талкачова (2 жоўтыя карткі), Смаргонь нанесла толькі 4 удары ў створ брамы Рудзенску (за увесь матч).

ФК "Рудзеск" з першых хвілін апанаваў сярэдзіну поля і пачаў расшатваць абарону гаспадароў. Лік мог быць адкрыты яшчэ у першыя 10 хвілін матчу, але двойчы "Смаргонь" выратаваў брамнік і аднаго разу крыху не пацэліў Ілля Наздрын-Платніцкі. Тым не меней, ужо на 17-й хвіліне Ілля рэабілітаваўся - прыгожым ударам з-за межаў штрафной пляцоўкі адправіў мяч у далёкую "дзевятку" смаргонцаў.

А на 39-й хвіліне адзначыўся навічок каманды - Сяргей Кошэль. Атака па правым фланзе завяршылася перадачай у цэнтр штрафной. Яе каленам (!!!) замкнуў Сяргей Кошэль. Пасля ўдару мяч трапіў у перакладзіну і заляцеў у браму – 0:2.Наступнай хвіліны за другую жоўтую картку з поля быў выдалены Дзьмітры Талкачоў. "Рудзенск" застаўся ўдзесяцёх.

Папраўдзе, колькасная перавага не дапамагла гаспадарам. Яны, натуральна, паспрабавалі зрабіць "навалу" на абарону "Рудзенску". Спякотнае надвор'е, папраўдзе не дазваляла гуляць на вялікіх хуткасцях. Дастаткова сказаць, што арбітр двойчы спыняў гульню, каб футбалісты маглі "папіць вадзічкі". Таму атакі Смаргоні былі больш "пазіцыйнымі. А вось "абароткі" "Рудзенску" выглядалі вастрэйшымі. Голая статыстыка: за увесь матч Смаргонь нанесла 15 удараў у бок брамы Рудзенску (з іх 12 – пасля выдалення Талкачова) і толькі 4 з 15 (3 пасля выдалення) патраплялі у створ. Статыстыка Рудзенску: 14 удараў (7+7), 8 у створ (5+3).

Такім чынам лік 0-2 на нашу карысць – цалкам заканамерны фінал гульні. Пасля 17 тураў наша каманда з 28 заліковымі пунктамі займае 5 радок турнірнай табліцы.

Наступны супернік
21 жніўня наша каманда на сваім полі прымае слонімскі "Камунальнік". Хоць каманда і знаходзіцца на 14-м месцы турнірнай табліцы, але лічыць яе "лёгкім супернікам" не выпадае. Камунальнік узмацніўся ў часе летняй паўзы. І першыя 2 туры пасля перапынку адзначыўся нічыйнымі вынікамі у гульнях супраць лідараў лігі. У 16-м туры на выедзе разышоўся 0-0 з нясвіжскім "Верасам" (дарэчы, у 1-м коле "Рудзенск" прайграў "Верасу" на сваім полі). А 14 жніўня "Камунальнік" дома згуляў 1-1 са СКВІЧам, які, дарэчы, займае 4 радок турнірнай табліцы.

Крыніца: Свіслач:рэгіянальны партал

Валідольны матч

svislac — Tue, 10 Aug 2010 11:53:24 GMT

У гэтую суботу ФК "Рудзенск” прымаў на сваім полі лідара чэмпіянату Беларусі па футболу сярод каманд першай лігі ФК "Гомель”. Гульня выдалася спякотнай: пратакол зафіксаваў тэмпературу паветра +35 а падзеі на полі таксама развіваліся імкліва і драматычна.

У анонсе да гульні мы пісалі, што матч супраць "Гомеля” будзе відовішчным: "Гомель" будзе прагнуць рэабілітавацца за хатнюю нічыю 1-га кола, а "Рудзенск" – набіраць заліковыя пункты. Аднак такога развіцця падзей, уявіць не маглі.

Ужо першая атака гамельчан прыводзіць да прызначэння пенальці ў браму "Рудзенску”: нашы абаронцы збілі у штрафной нападніка "Гомеля” Казеку. Наш малады брамнік Раман Сцяпанаў разлічыў накірунак удару, але дацягнуцца да мяча не здолеў. 0-1 на карысць ФК "Гомель” ужо на 3-й хвіліне гульні.

Адказ "Рудзенску” прыводзіць да небяспечнага кутавога. Гульцы "Гомеля” здымаюць мяч літаральна з нагі Сяргея Бубнова. Пасля выхад сам-насам гасцей, але Раман Сцяпанаў надзейна фіксуе мяч. Праз хвіліну Раман ізноў ратуе каманду.

Пасля Рудзенск праводзіць серыю небяспечных атак. У 2-х выпадках гамельчан ратуе брамнік, а на 21-й хвіліне Пышнік моцна прабівае справа – мяч праходзіць меньш чым у палову метры ад штангі. І тут жа адказ "Гомеля” – ізноў правал нашай абароны, выхад сам на сам. І зноўку цудоўна гуляе Сцяпанаў.

Наступныя 8 хвілін гульня праходзіць у сустрэчных атаках, але на 29 хвіліне той жа Казека, які раней зарабіў пенальці, урываецца ў трафную і моцна б’е метраў з 8. Сцяпанаў бяссільны: 0-2 на карысць Гомеля.

Адказ "Рудзенску” не прымусіў сабе чакаць – хуткая атака, перавод мяча на правы фланг, удар, кутавы. Пасля падачы кутавога мяч патрапляе на Сяргей Бубноў і той у 1 дотык скіраваў яго у браму. 1-2.

Рудзенск паспрабаваў даціснуць супернікаў, але да 38-й хвіліны барацьба збольшага ішла хоць на палове Гамяльчан, але да небяспечных удараў справа не даходзіла. А вось на 39-й хвіліне гомельцы праводзяць цудоўную контратаку – серыя перадач і нашы абаронцы аказваюцца па-за справай. Але, на шчасце, нападнік гасцей прабівае вышэй за браму.

Адказ "Рудзенску” не прымусіў сабе чакаць: Бубноў прарываецца справа, брамнік "Гомелю” адбівае мяч перад сабою, Сяргей першы на падхопе і аддае пас налева, на Іллю Наздрына-Платніцкага. А той расстэльвае ўжо пустую браму. 2-2. І на садыёне пачынаюць сур’ёзна казаць пра магчымасці Рудзенску прыгожа перайграць лідара першынства.

Гомель, папраўдзе адказвае 2-ма вострымі атакамі. Спачатку пасля ўдару галавой (старая праблема нашай абароны – гульня на другім паверсе) цудоўна грае Сцяпанаў. А праз хвіліну абаронцы паспяваюць выбіць мяч у аўт.

Рудзенск адказаў атакай на апошняй хвіліне, але моцны ўдар Сяргея Шаліма прыйшоўся вышэй за браму.

Другі тайм пачаўся з небяспечных атак гасцей, але наш брамнік гуляў бездакорна. Адказ Рудзенску – моцны далёкі ўдар на 48-й хвіліне Брамнік Гомлі толькі з другой спробы фіксуе мяч. На падборы у штрафной, на жаль, нікога з нападнікаў "Рудзенску” не было. Нашы гульцы прыціскаюць гасцей да іх штрафной, ідзе барацьба з бракам перадач з абодвух бакоў. На 52-й хвіліне ізноў праходзіць небяспечная перадача з правага флагну. Брамнік "Гомелю” выскоквае браць навясны мяч, але не ўтрымлівае яго ў руках. На падборы і дабіванні зноўку нікога з рудзенскіх гульцоў.

Далей гульня развіваецца на сустрэчных курсах. Праўда, больш удараў у бок брамы наносяць гульцы ФК "Рудзенск”. З найбольш небяспечных: 56-я хвіліна, удар Бубнова пасля праходу па правым фланзе – мяч ляціць паралельна лініі штрафной. На прастрэл ніхто з нашых гульцоў не пайшоў; 62-я хвіліна спачатку пасля ўдару Казака абаронца гасцей выносіць мяч. Увод мяча, кароткі розыгрыш і пасля ўдару галавой брамнік "Гомелю” ратуе сваю каманду.

А вось "адваротка” Гомлі стала бадай пераломным момантам у гульні. Нападнік гасцей атрымлівае мяч у штрафной, перакідвае праз Сцяпанава – лік 2-3 на карысць ФК "Гомель”.

Далей адбыўся досыць вясёлы эпізод: узрадаваныя спагадачы гасцей высыпалі на поле віншаваць футбалістаў. Лавіць іх кінуліся Мар’інагорскія міліцыянты. Забег па полі працягваўся блізу хвіліны. Пасля вяртання фанатаў на іх месцы, ахоўнікі правапарадку фактычна атачылі гасцявы сектар.

Наступныя падзеі на полі можна ахарактарызаваць адным словам: барацьба. Вельмі шмат адзінаборстваў, абедзьве каманды ідуць у адхоп мяча адразу пасля яго страты. Больш пагрозаў, праўда стварае Рудзенск. Запомнілася спроба Іллі Наздрына Платніцкага увайсці ў штрафную па левым фланзе – абаронца "Гомелю” выводзіць мяч на кутавы. Праз 4 хвіліны, Бубноў урываецца ў штрафную, перакідвае брамніка, але мяч не патрапляе ў браму. Праз 10 хвілін, на 86 хвіліне гульні – ізноў закід у штрафную Гомеля, але ніхто з нападнікаў не пабег на перадачу – адчувалася стомленасць.

На 88-й хвіліне гамяльчане замест Казекі выпускаюць навічка каманды Станіслава Сазановіча. І той адразу ж забівае: перадача верхам з флангу і Сазановіч галавой моцна прабівае пад перакладзіну. Наш брамнік не дацягваецца да мяча. 2-4.

Суддзя дадаае 4 хвіліны гульнявога часу. І ўжо на другой дададзенай хвіліне прарыў і выхад сам-на сам з нашым брамнікам нападніка гасцей. Той прабіў дакладна. 2-5.

Праз хвіліну "Рудзенск” мог скараціць разрыў у ліку – Молі Нестар Ебабісэ адгукнуўся на перадачу верхам і прабіў галавою. Брамнік Гомелю узяў мяч.

Такім чынам лік гульні 2-5 на карысць ФК "Гомель”. Лідар, на жаль, здолеў давесці абгрунтаванасць свайго месца ў турнірнай табліцы.

Прэс-канферэнцыя пасля матчу

Алег Кубараў, галоўны трэнер ФК "Гомель”:

- Матч першага кола супраць "Рудзенску” у нас атрымаўся не меньш напружаным, але галоў не было. Сёння мы, мусіць, кампенсавалі гэты недахоп – і мы і супернік забілі шмат мячоў. Па сканчэнні гульні радуемся мы, бо мы перамаглі. Але стала лягчэй толькі пасля таго як забілі 4-ы мяч. Пачалі гульню добра, але з-за спёкі, адскокаў, пасля якіх нашаму брамніку было складана лавіць мяч унеслі нервознасць у абарону, што прыводзіла да памылак. У сярэдзіне матчу гулялі слаба. За намі толькі пачатак і канцоўка гульні. Гэта і прадвызначыла вынік. І што ён на нашу карысць – самае галоўнае пры такой спёцы.

Сяргей Пышнік, галоўны трэнер ФК «Рудзенск»:

- Згулялі так, як маглі гэта зрабіць на дадзены момант. Ёсць праблемы са складам, адсутнічалі футбалісты, якія маглі б узмацніць гульню з якімі мы сканчвалі першае кола. Дзесьці не выручыў брамнік, дзесьці абаронцы згулялі не так як належыць, і як варта было. Трывалі колькі маглі. Першы тайм спадабаўся, але каб не зарабілі пенальці, цікава было б пабачыць як развіваліся б падзеі. Супернік рэалізаваў усе свае моманты. Але нічога страшнага, будзем ісці далей. Прайгралі лідару – галоўнае астатніх перайграць.

За ФК "Рудзенск" на поле выходзілі: Раман Сцяпанаў (1), Сяргей Зеневіч (2), Сяргей Каваленка (3, Міхаіл Шчуцкі (5), Максім Горбач (10), Ілля Наздрын-Платніцкі (21), Ігар Пышнік (8, заменены на Якава Казака (№15) на 53'), Дзьмітры Таўкачоў (12, на 85’ заменены на Молі Нестара Ебабісэ (№14)), Дзьмітры Трындзюк (20), Сяргей Бубноў (18) , Дзьмітры Парфёнаў (7, замена на Сяргея Шаліму (№9) на 39’)

ФОТАРЭПАРТАЖ З ГУЛЬНІ ДАСТУПНЫ НА СВІСЛАЧ:РЭГІЯНАЛЬНЫ ПАРТАЛ

Цэнтральны матч чэмпіянату: супрацьстаянне лідараў

svislac — Fri, 06 Aug 2010 10:30:29 GMT

Пачынаецца другое кола Чэмпіянату Беларусі па футболу сярод каманд І лігі. І цэнтральным паедынкам 16 туру без сумневу стане супрацьстаянне ў Мар'інай Горцы, дзе ФК "Рудзенск" прыме ФК "Гомель". Цікавасці дадае факт, што праз колькі тыдняў матч у Мар'інай Горцы "паўторыцца" – у розыгрышы 1/8 кубку Беларусі.

Адпаведна, на кароткі адпачынак ФК "Рудзенск" сышоў у вельмі добрым гуморы. У часе перапынку Іван Барташэвіч і Сяргей Пышнік праглядзелі патэнцыйных навічкоў каманды. Ужо на сёння вядома, што у ФК Рудзенск перайшоў з "Партызана" 27-гадовы абаронца Максім Горбач (на фота).

Адбыліся і пэўныя "страты". ФК "Рудзенск" пакінулі Аляксей Хадневіч, Дзяніс Шынгірэй, Яўген Міненкоў. Аляксей, хутчэй за ўсе працягне кар'еру ў "Зорцы-БДУ". Пра далейшы лёс Дзяніса і Яўгена пакуль што інфармацыяй не валодаем.

Моладзь нашага клубу правяла таварыскі матч з камандай "Падляшша" (Бяла Падляска). Пройгрыш 1-2. Што да супернікаў, то "Падляшша" – базавы клуб Акадэміі фізічнага выхавання (аддзяленне футболу) РП. Выступае ў ІІІ лізе першынства Польшчы.
Дарэчы, гэта быў першы міжнародны матч на стадыёне г.п. Свіслач.

Перад матчам.
Цэнтральным паедынкам 16 туру, без сумневу, стане супрацьстаянне ў Мар'інай Горцы, дзе ФК "Рудзенск" прыме ФК "Гомель". Цікавасці дадае факт, што праз колькі тыдняў матч у Мар'інай Горцы "паўторыцца" – у розыгрышы 1/8 кубку Беларусі.

"Гомель" на сёння на першай прыступцы турнірнай табліцы, "Рудзенск" – на чацьвёртай. Пры гэтым наша каманда ў першым коле ў Гомлі згуляла ўнічыю 0-0. Гэта, дарэчы адзіная нічыя гамельчукоў за усё першае кола.

Чым небяспечны наш супернік?

ФК "Гомель", натуральна, ставіць перад сабою мэту вярнуцца ў вышэйшую лігу. Падбор футбалістаў і якасць гульні дазваляюць кіраўніцтву клубу разглядаць "вышку" як рэальны вынік гэтага сезону.

У 15 гульнях І кола наш супернік запомніўся граматнай і дысцыплінаванай гульнёй у абароне: каманда пачынае змагацца за мяч і прэсінгаваць яшчэ ў цэнтры поля. Пры гэтым паўбаронцы не грэбуюць патрэбай вяртацца на сваю палову поля. Як вынік – за 15 тураў каманда прапусціла 8 галоў. Лепшы паказчык (7) толькі ў мікашэвіцкага "Граніту".

Што да атакі, то "Гомель" – абсалютны рэкардсмен сярод каманд лігі – 36 забітых мячоў. Прычым 23 з іх на ліку трох найлепшых бамбардзіраў каманды: Дзьмітрыя Платонава (13), Сяргея Казекі і Кірыла Паўлючыка (па 5).

Цягам апошніх тыдняў у каманду прыйшлі атакуючы паўабаронца Руслан Юдзенкоў (1987 г.н.) з Ведрыча-97 і абаронца Станіслаў Сазонаў (1992 г.н.) з "Зоркі –БДУ"
Каманду пакінуў паўабаронца Дзьмітры Рабцаў, які перайшоў у "Ведрыч-97".
Таксама у "Ведрыч" адправіў малады гулец Павал Трубіла (1991 г.н.)

Што можна супрацьпаставіць:

Па першае, называць "Гомель" непрабіўной камандай асабліва на выедзе – досыць гучна. З 8 прапушчаных галоў 5 – гамельчукі прывезлі з "выездаў". Прычым ад лідэраў, так і ад сярэднячкоў лігі: "Ліды", Сквіч, ДСК, Белкард.

Другое, атакуючы пыл гасцей можна спыніць праз асабістую апеку тых жа Платонава і Казекі. У разе, калі падобная тактыка спрацоўвае, Гомель досыць цяжка забівае. Асабліва на выедзе.

Трэцяе – хуткі пераход праз цэнтр поля (што, дарэчы нашы гульцы умеюць і любяць рабіць) – паўабаронцы "Гомеля", на якіх у значнай ступені і трымаецца "недатыкальнасць брамы" проста застануцца "па-за эпізодам".

Акрамя таго, наша каманда пачала пазбаўляцца "хваробы другога паверху" – праблемы барацьбы за верхавы мяч у сваёй штрафной. А, калі ўлічыць, што з 15 прапушчаных сёлета мячоў, 8 забіваліся пасля навесаў, то прагрэс радуе.

Яшчэ адзін аспект – удалы выступ нашага маладога брамніка – Рамана Сцяпанава, які бліскуча правёў кубкавую гульню з "Дняпром".

На што глядзець на матчы?
Тое, што гульня будзе весціся на вялікіх хуткасцях – досыць сумнеўна. Прычына – тэмпература паветра. Таму, верагодней за усё спарадычныя "выбухі" то адной то другой каманды. Але, мяркуем, матч будзе ўсё ж відовішчным: "Гомель" будзе прагнуць рэабілітавацца за хатнюю нічыю 1-га кола, а "Рудзенск" – набіраць заліковыя пункты. Акрамя таго, варта разглядаць гэты матч як генеральную рэпетыцыю кубкавай гульні (якая будзе мець значна большае значэнне). Адпаведна, абодва трэнеры будуць "у працэсе гульні" спрабаваць розныя тактычныя захады для нейтралізацыі супернікаў. Што, натуральна, дадасі цікавасці да гэтага відовішча.

Тым не меней, лічым, што "Гомель" – тая каманда, якую магчыма перамагаць на хатнім стадыёне. І, няхай гэта будзе цяжка – але рэальна

Таму запрашаем на футбол!
Дата: 7.08,
час 18-00,
Месца: Мар'іна Горка

Схему даезду і расклад транспарту можна паглядзець на арыгінале навіны на Свіслач:Рэгіянальны партал

1/16 кубку: Проста мы былі мацней

svislac — Tue, 20 Jul 2010 11:56:09 GMT

Прыемна, калі прагнозы збываюцца. Усяго толькі чатыры дні таму Свіслач:Рэгіянальны партал даваў анонс гульні 1/16 Кубку Беларусі па фублолу. Нягледзячы на грозны статус суперніка (удзельнік Лігі Еўропы), мы дапусцілі, што Днепр – не тая каманда, якую немагчыма праходзіць. Але таго, што адбывалася на полі, шчыра кажучы, не чакалі нават мы.

Нягледзячы на дапушчэнні пра адсутнасць на полі пэўнай колькасці ключавых гульцоў Дняпра, стартавы склад, па шчырасці, крыху пужаў. На поле выйшлі 7 з 11 гульцоў, якія радуюць нас паспяховым выступам Дняпра ў Лізе Еўропы.

А вось тое, што ў браме "Рудзенску" стаў Раман Сцяпанаў, прызнацца, крыху здзівавала. Не, кваліфікацыя нашага 18-ці гадовага брамніка не выклікала сумневаў. Пытанне толькі ў тым, што Раман два тыдні таму дэбютаваў у афіцыйных матчах за Рудзенск. Ён выйшаў на замену і правёў на полі (разам з дададзеным часам 5 хвілін). Таму крыху было неспакойна – ці пераадолее сваё хваляванне Раман. Гульня з Дняпром у кубку, пагадзіцеся, мае крыху большы статус чым рэгулярныя матчы 1-й лігі.

Тым не немей, хваляванні аказаліся дарэмнымі. Больш за тое, нядзельны матч стаў бенефісам моладзі ФК "Рудзенск". Ці нават Сяргея Ціханоўскага, якому меньш за месяц таму споўнілася 20 год.

Гульня:
"Днепр" як і належыць "вышэйшаму ў класе" паспрабаваў навязаць сваю гульню і ціснуць на нашу браму. Але, "Рудзенск" другі раз за апошні месяц прадэманстраваў як умее граць у такіх варунках. Наша каманда адышла ад далёкіх перадач і грала кароткім нізавым пасам. Гульцы стараліся трымаць мяч. Такі стыль, досыць хутка "выматаў" і без таго стомленых цяжкім календаром магілёўцаў. Тая пачалі памыляцца. І тут праявіла сабе ва ўсёй прыгажосці лінія паўабароны "Рудзенску".

Сяргей Ціханоўскі стаў сапраўднай праблемай для абароны гасцей. На 27-й хвіліне гульцы "Дняпра" фолам спыняюць перспектыўную атаку "Рудзенску". Прызначаецца штрафны. Ціханоўскі метраў з 25 б'ё па-над сценкай у правую дзевятку. Брамнік гасцей ледзьве здолеў уратаваць сваю каманду. Праходзіць 9 хвілін і ізноў контратака ФК "Рудзенск". Сяргей б'е з лініі штрафной. "Днепр" ізноў ратуе галкіпер. А вось па праходзе яшчэ 9 хвілін (на 44 хвіліне гульні) прызначаецца чарговы штрафны. Адлегласць – 20-21 метр. Выконвае Ціханоўскі. Удар Сяргея выйшаў на любату - мяч стукнуўся і ашэстак (перакладзіну) і заматляў у сетцы. 1-0 на карысць "Рудзенску".

Пачатак другога тайму быў цалкам за ФК "Рудзенск". Нашы гульцы ўдосталь пабавіліся мячыкам у сярэдзіне поля. А футбалісты з Магілёва… проста пабегалі па спякоце. Перыядычна Рудзенск арганізоўваў хуткія вылазкі да брамы гасцей. На 54-й хвіліне нашы футбалісты скарысталі праблемы правага флангу абароны гасцей, пра якія мы пісалі ў анонсе. Пачаўшы атаку па фланзе Сяргей своечасова пабачыў на іншым баку поля Іллю Наздрына-Платніцкага, які апынуўся па-за ўвагай абаронцаў "Дняпра". Перадача ўпоперак поля – Ілля прымае мяч, пакідае за спіною 2-х абаронцаў, змяшчаецца ў цэнтр і выкладе яго у левую дзевятку. 2-0

Пасля такога развіцця падзей трэнер "Дняпра" зразумеў што матч трэба ратаваць. На поле выпускаецца габарытны, нападнік Ганчара. Пачынаецца барацьба за "другі паверх" у нашай штрафной. Да і іншыя гульцы "Дняпра" паспрабавалі дадаць у хуткасці. На 71-й хвіліне абарона "Рудзенску" прапускае выхад сам-на-сам. Сцяпанаў адбівае ўдар. Але першым ля мяча апыніўся нападнік гасцей, які расстраляў ўжо пустую браму. 2-1.

Пасля гэтага Днепр распачаў аблогу нашай штрафной. Але, да гонару абаронцаў і маладога брамніка ФК "Рудзенск", аблога не прывяла да галоў. Фінальны лік 2-1 і наша каманда упершыню у сваёй гісторыі праходзіць у 1/8 розыгрышу кубка Беларусі.

Па выніках іншых матчаў 1/16 фінала у 1/8 выйшлі: «Камунальнік» (Слонім, Д2) (перайграў Жодзінскае «Тарпеда») «Партызан» (Мінск) (па пенальці перайграў СКВІЧ), «Дынама» (Брэст), «Нафтан» (Наваполацк), «Дынама» (Мінск), БАТЭ (Барысаў), «Нёман» (Гродна), «Шахцёр» (Салігорск), «Мінск», «Віцебск», «Белшына», «Гомель» (Д2), «Хваля» (Д2), «ДСК-Гомель» (Д2), «Гарадзея» (Д3).

Дарэчы, варта адзначыць што трэнер ФК "Рудзенск" летась ужо выбіваў з "Верасам" магілёўскі "Днепр". Таго сезону магілёўцы займалі 2-е месца ў вышэйшай лізе.

За ФК "Рудзенск" на поле выходзілі: Раман Сцяпанаў (1), Сяргей Зеневіч (2), Сяргей Каваленка (3, заменены на навічка камнады Горбача на 75'), Сяргей Ціханоўскі (13), Міхаіл Шчуцкі (5), Ігар Пышнік (8, заменены на Якава Казака на 56'), Дзьмітры Талкачоў (12, замены на пазіцыі: Дзяніс Шынгірэй 62', Дзьмітры Парфёнаў 81'), Сяргей Бубноў (18, замена на Кірыла Самахвала 90+3'), Сяргей Усеня (19), Дзьмітры Трындзюк (20), Ілля Наздрын-Платніцкі (21)

Прэс-канферэнцыя:
Юры Пышнік, галоўны трэнер ФК "Рудзенск: "Мы настройваліся на барацьбу, ведалі, што магілёўцам цяжка будзе гуляць на тры фронты. Футбалісты суперніка, кагадзе вярнуліся з далёкай паездкі. Разлічвалі даць бой і думалі пра дадатны вынік. Тым больш не ў першы раз выйграем у "Дняпра". Перамагалі іх нават, калі яны ішлі другімі ў табліцы.
Згулялі строга ў абароне, добра кантралявалі мяч, забілі, можна сказаць, гол ў распранальню праз добрае выкананне штрафнога. У другім тайме вызначыліся яшчэ. Магілёўцы, натуральна, у другой палове сустрэчы стаміліся, але і мы трохі падселі, таму вынік удвая ўдалы. Тым больш у нас вельмі ўдала згуляў малады брамнік – гэта была яго першая гульня. Прысутнічала невялікае напружанне, але добра, што так усё скончылася.
Мы будзем ваяваць, каб прайсці, як мага далей. І не важна, хто трапіцца ў наступным раўндзе"

Уладзімір Юрчанка, нападнік ФК "Днепр": "У нас назапасілася стомленасць, напэўна адбіўся далёкі пералёт з Нарвегіі. Да таго ж не ўсе футбалісты асноўнага складу гулялі. Ды і надвор'е паўплывала – задуха, было вельмі горача. Мне асабіста было трохі лягчэй, чым партнёрам, бо я ў Нарвегію не лётаў. Але ўсё адно, гуляць было цяжка ўсёй камандзе. У другім тайме пачалі падціскаць суперніка, забілі адзін гол. Можа, дзесьці на маральна-валявых ужо гулялі, таму і падпрыціснулі "Рудзенск". Была магчымасць адыграцца, напрыклад, Федзя Чорных стоадсоткава павінен быў забіваць, але не разумею, як у яго не атрымалася. Брамнік "Руденску" таксама вельмі добра згуляў.
Цяпер рыхтуемся да "Стабеку", усе думкі пра гэты матч. Я буду гуляць у гэтай сустрэчы, са мной усё звычайна"

Крыніца інфармацыі: Свіслач: Рэгіянальны партал

Русские переходят на систему осень-весна

svislac — Sun, 18 Jul 2010 07:48:51 GMT

Президент РФС Сергей Фурсенко в ходе пресс-конференции в подмосковном Нахабино сказал, что в 2012 году российский календарь синхронизируют с европейским.

Президент РФС Сергей Фурсенко в ходе пресс-конференции в подмосковном Нахабино, посвященной созданию в России Студенческой футбольной лиги, подчеркнул, что национальный футбольный чемпионат должен перейти на систему "осень - весна" летом 2012 года.

"Мы синхронизируем российский календарь с европейским. Произойдет это летом 2012 года", - сказал Фурсенко.

Кстати, Беларуский чемпионат вначале профодился именно по системе осень-весна. Однако у чиновников от спорта родилась идея синхронизировать его с российским. В результате в 1995 г. розыгрыш был переведён на систему весна-лето. Возможно, сейчас и БФФ задумается о возврате к нормальной европейской системе.

www.football.by

КУБАК БЕЛАРУСІ: Іх можна прабіваць (+ спасылка на відэа)

svislac — Fri, 16 Jul 2010 15:03:37 GMT

У гэтую нядзелю ФК "Рудзенск" у межах 1/16 розыгрышу Кубка Беларусі па футболе будзе прымаць бронзавага прызёра сезону 2009 у вышэйшай лізе Магілёскі "Днепр".
З аднаго боку рэгаліі гасцей і іх паспяховы выступ у сёлетнім розыгрышы Лігі Еўропы мае насцярожваць. У некаторых, магчыма выкліча і прыступ песімізму.

Але паспрабуем паглядзець на нашага суперніка з іншага боку. Па выніках першага кола чэмпіянату, "Днепр" займае толькі 7 радок турнірнай табліцы. Статыстыка гульняў +6 = 4 -8. Суадносіны забітых/прапушчаных мячоў адмоўныя: 16-29. У двух апошніх турах рэгулярнага чэмпіянату Днепр насуха прайграў. Спачатку было хатняе паражэнне ад Салігорскага "Шахцера" (0-2). А потым выязны матч з мінскім Дынама (3-0).

Пра учорашні цяжкі але паспяховы матч у Лізе Еўропы супраць нарвежскага "Станбеку" пісаць доўга не будзем. Але варта звярнуць увагу на далейшы каляндар Дняпра

18.07 Гульня з Рудзенскам
22.07 гульня з з нарвежцамі у Лізе Еўропы
24.07 сустрэча з БАТЭ у чэмпіянаце Беларусі

Такім чынам нашы супернікі правялі досыць цяжкі матч ў Нарвегіі. А пасля кубкавага супрацьстаяння ў Рудзенску іх чакаюць 2 вельмі непростыя гульні. Графік гульняў – кожныя 3 дні. Праход у наступны раўнд Лігі Еўропы само сабою важная справа для магілёўскай каманды. А сустрэча з БАТЭ не меньш прынцыповая, калі звярнуць увагу на турнірны стан Дняпра. (7 месца з 22 заліковымі пунктамі). Што дае нам пэўныя падставы для роздуму і спадзевы на тое, што трэнерскі штаб паберажэ пэўных футбалістаў для кубкавай гульні і супрацьстаяння з БАТЭ.

Пры гэтым варта звярнуць увагу на тое, што ў магілёўскай камандзе не ўсё гладка ў абароне – па колькасці прапушчаных галоў яны займаюць перадапошні радок сярод каманд вышэйшай лігі. Дарэчы праблемы ў цэнтры і на правым фланзе дняпроўскай абароны бачныя нават па відэа галоў у матчы з нарвежцамі. (ДАСТУПНА У АРЫГІНАЛЬНЫМ АРТЫКУЛЕ НА СВІСЛАЦКІМ ПАРТАЛЕ)

Вялікай колькасцю забітых каманда таксама не можа пахвастаць. У Дняпра няма ярка выражанага забіўнога форварда. Найлепшыя бамбардзіры каманды Андрэй Пясюк і Аляксандар Бычонак правялі толькі па 4 галы.
Найбольш карысны ў атацы Уладзімір Юрчанка (3 галы+ 4 галявыя перадачы).

Сыходзячы з вышэйзгаданага можна разлічваць што пры хуткаснай і дысцыплінаванай гульні прайсці магілёўскі "Днепр" цалкам рэальна. Хоць і вельмі цяжка.
Тым не меней ў гульцоў ФК "Рудзенск" ёсць дастаткова матывацыі каб праявіць сабе з лепшага боку.

Нагадаем, што матч адбудзецца ў нядзелю, 18 ліпеня на гарадскім стадыёне ў Мар'інай Горцы. Пачатак – у 18-00

Каб паспець на матч варта выязджаць са Свіслачы і Дружнага маршруткамі: у 14-45 і 15-30, 16-25, 17-15 Апошняя прыбывае на вакзал у МГ у 17-55. Адпаведна па павароце на стадыён будзе каля 17 – ёй варта ехаць калі вы ўпэўнены што маеце месцы на трыбунах.

З Рудзенску можна дабрацца на электрацыях (адпраўленне не пазней за 16-50

Экватар чэмпіянату: мы чацьвёртыя

svislac — Thu, 15 Jul 2010 12:29:24 GMT

Тры запар перамогі на фінішы першага кола Чэмпіянату Беларусі па футболе сярод каманд першай лігі дазволілі ФК "Рудзенск" імкліва падняцца ў турнірнай табліцы адразу на 6 пазіцый і заняць ганаровае 4-й месца ў агульным заліку.

7 ліпеня. ФК "Хімік" – ФК "Рудзенск"
Ужо на першых хвілінах гульні нашы футбалісты азадачылі "хімікаў". Дэбютная атака ФК "Рудзенск" скончылася фолам. А вось другая завяршылася ударам Іллі Наздрына-Платніцкага, які брамнік гаспадароў адбіў. На дабіванні самым першым апыніўся Сяргей Бубноў. І лік стаў 0-1 на карысць нашай каманды.

Светлагорцы паспрабавалі распачаць сваю атаку. Але нездарма паўабарона Рудзенску выклікае павагу ў супернікаў. Перахоп мяча, Пышнік вырываецца па левым фланзе, аддае перадачу на пакінутага на самоце ў цэнтры штрафной Наздрына-Платніцага. І лік ужо 2-0. А ідзе толькі 5 хвіліна гульні.

Пасля такога дэбюту нашы гульцы крыху супакоіліся. За што ледзьве не былі пакараныя. Спачатку пасля флангавага праходу нападнік гасцей прабівае наўпрост у Юркевіча. А праз дзесятак хвілін мяч прайшоў у літаральных сантыметрах ад штангі нашай брамы.

Зразумеўшы, што гаспадары разлічваюць выратаваць гульню, футбалісты "Рудзенску" фактычна заперлі "Хімікаў" на сваёй палове і, па вялікім рахунку маглі б яшчэ прынамсі 2 разы забіць. Тым не меней на перапынак каманды сышлі пры рахунку 0-2 на нашу карысць.

Другі тайм пачаўся па сцэнару дэбюту сустрэчы. Ужо на 54-й хвіліне атака завяршаецца трапным стрэлам Сяргея Шалімы. Госці у адказ паспрабавалі выканаць нейкае падабенства штурму, але ўсе іх спробы прарваць нашу абарону завяршаліся стратай мяча яшчэ на падыходзе да штрафной Юркевіча. А вось атака Рудзенску на 72-й хвіліне зрабіла лік разгромным: 0-4. Гол правёў Сяргей Ціханоўскі.

Атрымаўшы найбольшую перавагу над супернікам у гісторыі сваіх выступаў у першай лізе "Рудзенск" заўважна знізіў хуткасці. За што і быў пакараны. На 79 хвіліне адзін з лепшых бамбардзіраў першынства Сяргей Дашук адарваўся ад нашых абаронцаў і забіў гол прэстыжу: 1-4.
Гэты лік і стаў фінальным.

Склад ФК Рудзенск: Уладзімір Юркевич (капітан, № 34) (на 86 хвіліне заменены на Р. Сцяпанава (№ 1)), Сяргей Зеневіч (2), Міхаіл Шчуцкі (5), Дзьмітры Парфёнаў (7, заменены на Сяргея Ціханоўскага на 58 хвіліне), Ігар Пышнік (8), Дзьмітры Талкачоў (12, заменены на Якава Казака 65'), Антон Рабцаў (16, заменены на Сяргея Каваленку на 77'), Сяргей Бубноў (18, заменены на Сяргея Шаліма на 53'), Сяргей Усеня (19), Дзьмітры Трындзюк (10), Ілля Наздрын-Платніцкі (21).

11 ліпеня ФК "Рудзенск" – ФК Ведрыч-97

Нягледзячы на розны цяперашні статус нашы клуб "Ведрыч-97" выклікае павагу. Клуб які доўгі час выступаў у Вышэйшай лізе, фіналіст кубку Беларусі. Каманда, якая выхавала такіх вядомых гульцоў як Міраслаў Рамашчанка, Віталь Баранаў, Барыс Гаравы, Алег Аўрамаў, Павал Сітко.

Цяпер каманда, натуральна перажывае не лепшыя часы. Напярэдадні гульні Ведрыч знаходзіўся на перадапошнім месцы турнірнай табліцы. І трэнерскі штаб паставіў перад гульцамі задачу выйграваць любым коштам. Дадатковыя 3 пункты дазволілі б клубу пакінуць небяспечную "зону вылету" напярэдадні перазаключэння дамоваў са спонсарамі і трансфернага вакна.
Адпаведным быў і малюнак гульні. Ведрыч усімі сіламі намагаўся ісці наперад. Выкарыстоўваў у першую чаргу верхавыя і дальнія падачы (мы ўжо звярталі ўвагу на тое, што абарона ФК "Рудзенск" не заўсёды ўпэўнена грае на другім паверсе).
Наш трэнерскі штаб пасля упэўненай перамогі у Светлагорску наадварот паставіў на стыль гульні з хуткім нізавым пасам і пераходам праз сярэдзіну поля ў 3-4 перадачы.

Такая тактыка дала свой плён і ўжо з 15 хвіліны ніхто не мог сказаць пра перавагу гасцей. Наша каманда валодала ініцыятывай і стварыла некалькі досыць вострых момантаў ля брамы "Ведрыча". Запомніліся удары Парфёнава, Бубнова, Наздрына-Платніцкага.

Апошняму, дарэчы, няшчасціць з завяршальным ударам. Ілля часцяком выконвае вялікі аб'ём чарнавой работы. Але калі здавалася што выйшаў на 100% гол, фартуна паварочваецца спіною. Вось і гэты раз ён не здолеў пацэліць у пустую браму з некалькіх метраў.

Знакамітае футбольнае правіла "не забіваеш ты – забіваюць табе" спрацавала на 42 хвіліне калі паўабаронца "Ведрыча" здолеў такі прабіць Юркевіча.
На перапынак каманды сышлі з лікам 0-1 на карысць гасцей.

Другі тайм пачаўся ў спробах рэчыцкіх футбалістаў замацаваць перавагу ў ліку. За першыя 10 хвілін гульні яны прынамсі 4 разы здолелі прабіць у створ нашай брамы.

А вось "абаротка" у выкананні "Рудзенску" была куды больш плённай і цікавай. На 50-й хвіліне гульні на ўдарнай пазіцыі апыняецца малады гулец Сяргей Усеня. І ён не марнуе свайго моманту 1-1.

А яшчэ праз 10 хвілін лік сваім праведзеным галам адкрыў Якаў Казак. Пасля таго як лік стаў 2-1, "Ведрыч" усімі сіламі кінуўся ратаваць гульню.

Рудзенск са свайго боку працягнуў гуляць нізавым хуткім пасам. І, па шчырасці глядзеўся значна больш востра і цікава.

Таму фінальны лік 2-1 падаецца цалкам справядлівым. Адны выкладаліся на полі і дэманстравалі звышматывацыю. А іншыя былі банальна вышэй класам.

За "Рудзенск" на поле выходзілі: Уладзімір Юркевич (капітан, № 34), Сяргей Зеневіч (2), Міхаіл Шчуцкі (5), Дзьмітры Парфёнаў (7, заменены на Сяргея Шаліма на 46'), Ігар Пышнік (8, заменены на Якава Казака на 55'), Дзьмітры Талкачоў (12, заменены на Сяргея Ціханоўскага на 62'), Антон Рабцаў (16, заменены на Сяргея Каваленку на 52'), Сяргей Бубноў, Сяргей Усеня (19, заменены на Кірыла Самахвала на 81'), Дзьмітры Трындзюк (10), Ілля Наздрын-Платніцкі (21).

Такім чынам за кошт бліскучага фіналу (3 гульні – 3 перамогі) ФК Рудзенск здолеў істотна паправіць сваё турнірнае становішча. А менавіта падняцца з 10 на 4 месца ў агульным заліку.

Крыніца: Свіслач:рэгіянальны партал